मुख्यमंत्री शिंदे यांचे अनधिकृत बार, ढाबे, गुटखा पार्लरवर कारवाईचे आदेश
पनवेल तालुक्यात टँकरने पाणीपुरवठा सुरुच
नवीन पनवेल : जून महिना संपायला आला तरी देखील पनवेल तालुक्यात हवा तसा मुसळधार पाऊस पडलेला नाही. त्यामुळे पनवेल तालुक्यात जवळपास ४० गांव-वाड्यांमध्ये टँकरने पाणीपुरवठा सुरु आहे.
पावसाळा सुरु झाला आहे. मात्र, मुसळधार पाऊस पडत नसल्याने अद्यापही पाणीटंचाई कमी झालेली नाही. १४ जून पर्यंत पनवेल तालुक्यात ५० ठिकाणी गाव-वाड्यांमध्ये १५ टँकर मार्फत पाणीपुरवठा सुरु होता. त्यानंतर कोरल आणि घेरावाडी येथील एक टँकरचा पाणीपुरवठा बंद करण्यात आला. त्यामुळे १४ टँकरने पाणीपुरवठा सुरु होता. या आठवड्यात वाजे येथील ११ ठिकाणचा एका टँकरने होणारा पाणीपुरवठा बंद करण्यात आला आहे. त्यामुळे सद्यस्थितीत तालुक्यात १३ ठिकाणी टँकरने पाणीपुरवठा सुरु आहे.
गत आठवड्यापासून १३ गांव-वाड्यातील टँकरने पाणीपुरवठा बंद करण्यात आला आहे. त्यामुळे ३७ ठिकाणी टँकरने पाणीपुरवठा सुरु आहे. यात शिरढोण, आपटा, कसळखंड, वांगणी तर्फे वाजे, मालडुंगे, पाले बुद्रुक, खैरवाडी, वारदोली, वडघर, बारवई, नांदगाव, नानोशी, वांगणी तर्फे वाजे या ग्रामपंचायत मधील गाव-वाड्यांचा समावेश आहे. मुसळधार पाऊस पडल्यानंतर तालुक्यातील टँकरने पाणीपुरवठा बंद होऊ शकतो.
दरम्यान, हवामान खात्यामार्फत मुसळधार पावसाची शक्यता वर्तवण्यात येत आहे. मात्र, जून महिन्यातील २५ तारीख उजाडली तरी देखील सलग ३ ते ४ दिवस पाऊस बरसलेला नाही. त्यामुळे नद्या, नाल्या तुडुंब भरुन वाहत नाहीत. काही ठिकाणी एप्रिल-मे महिन्यातच बोअरवेलचे पाणी कमी झाले आहे. त्यामुळे मुसळधार पाऊस झाला तरच बोअरवेल आणि विहिरींना पाणी येईल आणि टँकरने होणारा पाणीपुरवठा बंद होईल.
