वारकऱ्यांच्या वारीत ट्रेलर घुसून अपघात
उरण : उरण ते आळंदी वारीसाठी निघालेल्या वारकऱ्यांच्या दिंडीत कामशेत घाटात कंटेनर ट्रेलर घुसून भीषण अपघात झाला आहे .या अपघातात उरण करळ येथील मंजुळा प्रभाकर तांडेल (वय-५३) या महिलेचा जागीच मृत्यू झाला. तर ८ वारकरी जखमी झाले असून त्यांना उपचारासाठी रुग्णालयात दाखल करण्यात आले आहे.
उरण येथील दावजी पाटील दिंडी आळंदीच्या कार्तिकी वारीसाठी याही वर्षी निघाली होती. या वारीत १५० वारकरी संप्रदायाचे नागरिक सहभागी झाले होते. कामशेत घाटातून दिंडी जात असताना घाटातील वळणावरुन उतरत असलेला कंटेनर ट्रेलर थेट दिंडीत घुसला. यावेळी दिंडीमध्ये सहभागी असलेल्या करळ येथील मंजुळा तांडेल या महिलेचा जागीच मृत्यू झाला आहे. तर या अपघातात ८ वारकरी गंभीर जखमी झाले आहेत. या अपघाताची माहिती मिळताच स्थानिक नागरिक आणि पोलीस घटनास्थळी दाखल झाले. जखमीना तातडीने जवळच्या रुग्णालयात हलवण्यात आले असून, त्यांच्यावर महावीर रुग्णालयात उपचार सुरू असल्याची माहिती मिळत आहे. या घटनेनंतर करळ गावावर शोककळा पसरली असून मोठ्या अंतःकरणाने गावकऱ्यांनी मंजुळा तांडेल यांच्या पार्थिवावर अंत्यसंस्कार केले.
