आ. मंदाताई म्हात्रे यांची सिडको एमडी सिंघल यांच्या समवेत बैठक
नवी मुंबई : नवी मुंबई शहर झपाट्याने विकासाच्या मार्गाने जात आहे. तसेच सन २०१४, २०१९ आणि २०२४ च्या कालावधीत नवी मुंबईमध्ये केलेल्या विकास कामांच्या जोरावर सलग ३ वेळा बेलापूर मतदार संघावर वर्चस्व ठेवणाऱ्या आमदार मंदाताई म्हात्रे यांची नवी मुंबईतील विविध प्रश्नांवर ‘सिडको'चे व्यवस्थापकीय संचालक विजय सिंघल यांच्या समवेत १४ नोव्हेंबर रोजी बैठक संपन्न झाली. या बैठकीत प्रलंबित असलेल्या विकास कामांचा आढावाही घेण्यात आला.
सदर बैठकीस आ. मंदाताई म्हात्रे यांच्यासह माजी नगरसेवक निलेश म्हात्रे, ‘सिडको'चे सह-व्यवस्थापकीय संचालक-२ शांतनू गोयल, सह-व्यवस्थापकीय संचालक-३ गणेश देशमुख, भाजपा पदाधिकारी प्रमोद जोशी, प्रवीण भगत, अशोक विधाते, शंकर पटेल, दत्ता पाटील, देवी सिंग, मंदिरांचे विश्वस्त आणि सदस्य उपस्थित होते.
सदर बैठकीमध्ये नवी मुंबईमध्ये महत्वपूर्ण होत असलेल्या प्रकल्पांसंदर्भात आढावा घेण्यात आला. तसेच बेलापूर, सीवुडस्, नेरुळ, जुईनगर, सानपाडा, तुर्भे, वाशी येथील विविध प्रश्नांवर चर्चा करण्यात आली. नवी मुंबईतील सर्व धार्मिक स्थळांचा सर्व्हे करुन ५०० मीटरचा सामाजिक दर लावून धार्मिक स्थळे नियमित करावी. नवीन काही छोटे भूखंड आहेत, ते धार्मिक स्थळांसाठी आरक्षित ठेवणे. फुलपाखरु उद्यान उभारण्याकरिता सारसोळे पामबीच लगत असलेल्या १२ एकर भूखंड नवी मुंबई महापालिकाकडे हस्तांतरीत करणे. दारावे गाव सेक्टर-२३ मधील भूखंड क्र.ए-१३ मच्छी आणि भाजी मार्केट करिता महापालिकेला हस्तांतरीत करण्यात यावा. बेलापूर गावातील भूखंड क्र.डी-९ ते १६ एफ २५ भूखंड मैदानासाठी हस्तांतरीत करणे. सीवुडस, सेवटर-४४ मधील भूखंड क्र.१६२ किंवा भूखंड क्र.५२ करावे गावातील नागरिकांकरिता समाज मंदिरासाठी हस्तांतरीत करणे, अशा अनेक विविध प्रश्न-मागण्यांबाबत ‘सिडको'चे व्यवस्थापकीय संचालक विजय सिंघल यांच्याशी चर्चा करण्यात आली. त्यावर व्यवस्थापकीय संचालक विजय सिंघल यांनी सकारात्मकता दाखवत सदर प्रश्न लवकरात लवकर मार्गी लावण्यात येणार असल्याची माहिती आ. मंदाताई म्हात्रे यांनी दिली.
