निवडणुकीसाठी मतदार यादी कार्यक्रमाची प्रभावी अंमलबजावणी करा
नवी मुंबई : नवी मुंबई महापालिका सार्वत्रिक निवडणूक-२०२५ करिता प्रभाग रचना आणि आरक्षण सोडत सुव्यवस्थित रितीने पार पडली असून प्रारुप प्रभागनिहाय मतदार यादी प्रसिध्दी विषयक कार्यक्रम ‘राज्य निवडणूक आयोग'च्या निर्देशानुसार करण्यात येत आहे. या विषयी तसेच मतदान केंद्र निश्चिती विषयी महापालिका आयुक्त डॉ. कैलास शिंदे यांनी आढावा बैठक घेत विहीत वेळेत कार्यवाही करण्याचे निर्देश संबधित अधिकारी, कर्मचारी यांना दिले. याप्रसंगी ‘निवडणूक विभाग'चे उपायुक्त भागवत डोईफोडे, निवडणूक मतदार यादीकरिता नियुक्त प्राधिकृत तथा नियंत्रक अधिकारी परिमंडळ-२ उपायुक्त संजय शिंदे तसेच इतर विभागप्रमुख, अधिकारी, कर्मचारी उपस्थित होते.
स्थानिक स्वराज्य संस्थांच्या निवडणुकांसाठी राज्य निवडणूक आयोग स्वतंत्रपणे मतदार यादी तयार करत नसून ‘भारत निवडणूक आयोग'कडून तयार होणारी विधानसभाची मतदार यादी वापरण्यात येते. याकरिता १ जुलै २०२५ रोजी अस्तित्वात असलेल्या विधानसभा मतदार यादीचे प्रभागनिहाय विभाजन करुन मतदार यादी तयार करण्यात येते. सदर प्रारुप मतदार यादी ‘राज्य निवडणूक आयोग'च्या आदेशानुसार प्रसिध्द केली जाणार असून त्यावर हरकती-सूचना दाखल करण्यासाठी कालावधी दिला जाणार आहे.
या प्रारुप मतदार यादीत नव्याने कोणतेही नाव समाविष्ट होणार नसून प्रारुप प्रभागनिहाय मतदार यादीत लेखनिकांच्या काही चुका असल्यास, दुसऱ्या प्रभागातील मतदार चुकून अंतर्भूत झाले असल्यास, संबधित प्रभागातील विधानसभा मतदार यादीत मतदारांची नावे असूनही महापालिकेच्या संबधित प्रभागाच्या मतदार यादीमध्ये नावे वगळण्यात आली असल्यास अशा मतदारांची नावे समाविष्ट करणे, मृत व्यक्तींची नावे आढळल्यास किंवा त्याबाबत हरकती किंवा सूचना प्राप्त झाल्यास त्यांची नोंद मार्क कॉपी मध्ये घेणे, केवळ अशा प्रकारची सुधारणा, दुरुस्ती करता येईल.
विहित मुदतीत प्राप्त होणाऱ्या हरकती-सूचना यांवर नियमाप्रमाणे विचार करुन आवश्यक त्या सुधारणा मतदार यादीमध्ये करण्यासाठी आणि अंतिम मतदार यादी तयार करण्यासाठी प्राधिकृत अधिकारी म्हणून विभाग प्रमुख आणि त्यांना सहाय्यक म्हणून इतर अधिकारी, कर्मचारी यांची नियुक्ती करण्यात येत आहे. या सर्व अधिकारी, कर्मचारी यांनी परस्पर समन्वयाने नियमानुसार काम करावे, असे निर्देश आयुक्त डॉ. कैलास शिंदे यांनी यावेळी दिले. या मतदार यादीत विषयक कामकाजाकरिता परिमंडळ-२ चे उपायुक्त संजय शिंदे यांची प्राधिकृत तथा नियंत्रक अधिकारी म्हणून नेमणूक करण्यात आली आहे. त्यांच्या समन्वयाने बिनचूक अंतिम मतदार यादी तयार करण्याचे काम करण्यात येणार आहे.
मतदान केंद्राच्या जागा निश्चित करताना विधानसभा निवडणुकीसाठी निवडलेल्या मतदान केंद्रांच्या अनुषंगाने महापालिका निवडणुकीसाठी एका मतदान केंद्रावर सरासरी ८०० ते ९०० मतदारांचे मतदान असावे. मतदान केंद्रावर जाण्यासाठी मतदारांना जास्त लांब जावे लागू नये याची काळजी घेण्यात यावी. नवी मुंबई महापालिका निवडणुकीसाठी ‘निवडणूक आयोग'ने निश्चित केलेल्या मतदार यादीच्या कार्यक्रमाची प्रभावी अंमलबजावणी करावी आणि जास्तीत जास्त नागरिकांपर्यंत याबाबतची माहिती पोहोचविण्याच्या दृष्टीने कार्यवाही करावी.
-डॉ. कैलास शिंदे, आयुक्त-नवी मुंबई महापालिका.
