‘एज्युसिटी'द्वारे नवी मुंबईची नवीन शैक्षणिक ओळख
नवी मुंबई : ‘सिडको'तर्फे नवी मुंबईतील पनवेल तालुक्यातील कुंडेवहाळ येथे उत्कृष्टता केंद्र (सेंटर ऑफ एक्सलन्स) अंतर्गत, अंदाजे १०० हेक्टर क्षेत्रावर आंतरराष्ट्रीय एज्युसिटी प्रकल्प विकसित करण्यात येत आहे. एकात्मिक आरोग्यविषयक आणि शैक्षणिक सुविधा, आंतरराष्ट्रीय मानकांचे क्रीडा संकुल, कौशल्य केंद्र उभारण्याच्या प्रमुख उद्देशाने उत्कृष्टता केंद्र ‘सिडको'तर्फे विकसित करण्यात येत आहे. या प्रकल्पाद्वारे नवी मुंबई नजिकच्या काळात जागतिक शिक्षण केंद्र म्हणून उदयास येणार आहे. या प्रकल्पाकरिता जमीन विकसित करण्याच्या कामाला गती देण्यात आली असून निविदा प्रक्रिया सुरु आहे.
१४ जून २०२५ रोजी सिडको, महाराष्ट्र शासन आणि यॉर्क विद्यापीठ, ॲबरडीन विद्यापीठ, वेस्टर्न ऑस्ट्रेलिया विद्यापीठ, इलिनॉइस इन्स्टिट्युट ऑफ टेक्नॉलॉजी आणि आयईडी विद्यापीठ या ५ नामांकित परदेशी विद्यापीठांसोबत सामंजस्य करारनामा करण्यात येऊन नवी मुंबईमध्ये कॅम्पस् स्थापन करण्याकरिता या विद्यापीठांना इरादापत्रे प्रदान करण्यात आली.
महाराष्ट्र शासनाच्या मार्गदर्शनाखाली, ‘सिडको'च्या एज्युसिटी उपक्रमांतर्गत नवी मुंबईमध्ये जागतिक दर्जाच्या विद्यापीठांचे कॅम्पस् स्थापन करण्यात येणार आहेत. कुंडेवहाळ येथे सुमारे १०० हेक्टरवर एज्युसिटी विकसित करण्यात येत असून ती नवी मुंबई आंतरराष्ट्रीय विमानतळाच्या ३-४ कि.मी.च्या परिघात वसलेली आहे. या व्यतिरिक्त मल्टिमोडल कॉरिडॉर, समृध्दी महामार्ग, मुंबई-पुणे द्रुतगती महामार्ग याद्वारे देखील कनेक्टिव्हिटी लाभणार आहे. मुंबईहून वाहनाद्वारे एज्युसिटी एक तासाच्या अंतरावर असून एरोसिटी, नैना शहर, खारघर कार्पोरेट पार्क, गोल्फ कोर्स आणि पनवेल महापालिका क्षेत्रापासूनही नजिकच्या अंतरावर आहे.
‘एज्युसिटी'करिता देण्यात आलेल्या जमिनीच्या सपाटीकरणाचे काम आवश्यक असून जमिनींचे सुलभरित्या वाटप करता यावे म्हणून ४ स्वतंत्र भूखंडांवर भूविकासाचे काम करण्यात येणार आहे. ‘सिडको'तर्फे भाग-१ आणि भाग-२ मधील ५० हेक्टर जमिनीच्या विकासासह ४५ मी. बाय ३० मी. रुंद प्रवेश मार्गाचे काम हाती घेण्यात आले असून ई-निविदा प्रक्रिया प्रगतीपथावर आहे. सदर कामे पूर्णत्वास गेल्यानंतर ४५ मी. रुंद मार्गाद्वारे राष्ट्रीय महामार्ग-३४८ (राष्ट्रीय महामार्ग ४बी) ‘जेएनपीटी'वरुन एज्युसिटी येथे थेट प्रवेश मिळणार आहे. त्याचप्रमाणे सिडको, नवी मुंबई आंतरराष्ट्रीय विमानतळ ते पनवेल रेल्वे स्थानक जोडणारी मेट्रो लाईन एम-२४ ची योजना आखत आहे, जी नैना क्षेत्रापर्यंत विस्तारेल आणि प्रस्तावित एरोसिटी आणि ‘एज्युसिटी'ला देखील जोडेल.
नवी मुंबईला जागतिक शिक्षण केंद्र बनवण्याकरिता ‘सिडको'ची कटीबध्दता अधोरेखित करणारा सदर महत्त्वाकांक्षी प्रकल्प आहे. प्रकल्पाच्या भूविकासाची कामे आणि ई-निविदा प्रक्रिया यांना सुरुवात झाली असून देशाच्या शिक्षण क्षेत्रातील तो एक क्रांतिकारी प्रकल्प ठरणार आहे.
आंतरराष्ट्रीय एज्युसिटी देशामध्ये शैक्षणिक क्रांती घडवणारा प्रकल्प असून याद्वारे देशातील विद्यार्थ्यांना आंतरराष्ट्रीय स्तरावरील परदेशी विद्यापीठे आणि नामांकित शिक्षणतज्ञांकडून शिकण्याची संधी उपलब्ध होणार आहे. यामुळे ज्ञानी समाजाची निर्मिती, बहुसांस्कृतिक आदानप्रदान आणि संशोधन यांना चालना मिळणार आहे. नियोजित वेळेत एज्युसिटी प्रकल्प पूर्ण करण्यावर आमचा भर आहे. आंतरराष्ट्रीय एज्युसिटी ऐतिहासिक उपक्रम असून ज्यामध्ये एकाच ठिकाणी एकाच कॅम्पस्मध्ये १० हून अधिक आंतरराष्ट्रीय विद्यापीठे सामील असतील. तो देशातील अशा प्रकारचा एकमेव उपक्रम ठरेल.
-विजय सिंघल, उपाध्यक्ष तथा व्यवस्थापकीय संचालक, सिडको.
