दहावी नंतर नेमके काय? मार्गदर्शनासाठी मिरा-भाईंदर महापालिकेचा पुढाकार
मुख्यमंत्री शिंदे यांचे अनधिकृत बार, ढाबे, गुटखा पार्लरवर कारवाईचे आदेश
कार्यक्षेत्रातील बेकायदेशीर पब-बार, अंमली पदार्थ विक्रीच्या दुकानांवर धडक कारवाई
ठाणे : संपूर्ण महाराष्ट्र राज्य अंमली पदार्थ मुक्त व्हावा असा महत्वाकांक्षी निर्णय राज्याचे मुख्यमंत्री एकनाथ शिंदे यांनी घेतला असून याबाबत ठोस कारवाई करण्याचे निर्देश प्रशासनाला दिले आहेत. या पार्श्वभूमीवर ठाणे महापालिका आयुक्त सौरभ राव यांच्या आदेशानुसार ठाणे महापालिका क्षेत्रातील पब, बार आणि अंमली पदार्थ विक्री करणारी अवैध बांधकामे निष्कासित करण्याची कार्यवाही हाती घेण्यात आली आहे. या कारवाईत २७ जून रोजी महापालिका कार्यक्षेत्रातील शाळा, महाविद्यालयापासून १०० मीटर अंतराच्या आत असलेल्या एकूण ३१ पान टपऱ्या जप्त करण्यात आल्या. तर हॉटेल, पब्ज, बार असे मिळून ८ ठिकाणी तर ९ आणि शेडवर कारवाई करण्यात आली.
पुणे शहरामध्ये तरुण अंमली पदार्थांच्या आहारी गेल्याची प्रकरणे समोर येत आहेत. अशाप्रकारचे गैरप्रकार राज्यातील कुठल्याही शहरात घडू नयेत यासाठी मुख्यमंत्री एकनाथ शिंदे यांनी कठोर निर्णय घेवून महाराष्ट्रातील सर्व शहरातील अनधिकृत पब्ज, बार आणि अनधिकृत अंमली पदार्थ विक्री केंद्रे नष्ट करावीत, अशा सूचना दिल्या आहेत. याची सर्वत्र अंमलबजावणी सुरु आहे. ठाणे शहरात देखील प्रभाग समितीनिहाय असलेल्या पब्ज, बार आदिंवर धडक कारवाई करण्याचे आदेश आयुक्त सौरभ राव यांनी दिले असून त्यानुसार २७ जून पासून प्रभाग समितीस्तरावर ‘अतिक्रमण नियंत्रण-निष्कासन विभाग'चे उपायुक्त तसेच सहाय्यक आयुक्तांच्या उपस्थितीत आणि पोलीस बंदोबस्तात कारवाई करण्यात आली.
याअंतर्गत वागळे प्रभाग समिती कार्यक्षेत्रातील पंचशील बार, इंडियन स्वाद बार, अनधिकृत पानटपरी, गुटखा विक्रेते यांच्यावर कारवाई करण्यात आली. वर्तकनगर प्रभाग समिती कार्यक्षेत्रातील द सिक्रेट बार-हुक्का पार्लर तसेच कोठारी कंपाऊंड येथील पब, बारवर कारवाई करण्यात आली. याच परिसरातील सोशल हाऊस पब येथील अनधिकृत बांधकाम आणि अवैध पानटपऱ्यांवर कारवाई करण्यात आली.
लोकमान्य सावरकरनगर प्रभाग समिती अंतर्गत ज्ञानेश्वरनगर राजश्री शाहू महाराज विद्यालय येथील १०० मीटर परिसरात असलेल्या ३ टपऱ्या सील करण्यात आल्या. तसेच सावरकरनगर येथील ज्ञानोदय विद्यालय येथील पानटपरी जप्त करण्यात आली. उथळसर विभागातील अनधिकृत हॉटेल, हुक्का पार्लरवर कारवाई करण्यात आली. तर राबोडी येथील के. व्हिला शाळेपासून १०० मीटरच्या आतील पान टपऱ्या हटविण्यात आल्या.
त्याचप्रमाणे माजिवडा मानपाडा प्रभाग समिती अंतर्गत घोडबंदर रोड येथील खुशी लेडीज बार आणि ओवळा येथील मयुरी लेडीज बारवर कारवाई करण्यात आली असून पोकलेन मशीनच्या सहाय्याने येथील संपूर्ण बांधकाम जमीनदोस्त करण्यात आले. तसेच चितळसर मानपाडा, सिनेवंडर परिसरातील अनधिकृत बार, कापूरबावडी येथील स्वागत बारवर देखील कारवाई करण्यात आली. तसेच ए.पी.शहा कॉलेज जवळील अनधिकृत दिव्यांग स्टॉलची तपासणी करुन ज्या ठिकाणी धुम्रपान निषेध पदार्थ आढळून आले, ते स्टॉल जप्त करण्यात आले.
नौपाडा-कोपरी विभागात अनधिकृत हॉटेल, बारचे बांधकाम देखील जमीनदोस्त करण्यात आले. कोपरी परिसरात दिव्यांग व्यक्तींना देण्यात आलेले स्टॉल तसेच अनधिकृत स्टॉल यांची तपासणी करुन जेथे धुम्रपान निषेध पदार्थ आढळून आले, त्या ठिकाणचे स्टॉल सीलबंद करण्यात कारवाई करण्यात आली. या ठिकाणची ५ दुकाने सील करण्यात आली आहेत.
कळवा प्रभाग समिती मधील शाळा परिसरालगत १०० मीटरच्या आत असलेल्या पान टपऱ्यांवर तसेच अनधिकृत बारवर कारवाई करण्यात आली. दिवा विभागात संपूर्ण विभागाचा सर्व्हे करुन शाळांपासून १०० मीटर परिसरात असलेल्या पानटपऱ्या तसेच अनधिकृत हॉटेल, बार यांच्यावर देखील कारवाई करण्यात आली.
सदरची तोडक कारवाई सह-पोलीस आयुवत ज्ञानेश्वर चव्हाण, अतिरिक्त आयुक्त-२ प्रशांत रोडे, पोलीस उपायुवत अमरसिंग जाधव, ‘अतिक्रमण नियंत्रण-निष्कासन विभाग'चे उपायुक्त जी. जी. गोदेपुरे यांच्या मार्गदर्शनाखाली परिमंडळ-१चे उपायुक्त मनिष जोशी, परिमंडळ-२ चे उपायुक्त शंकर पाटोळे, परिमंडळ-३ चे उपायुक्त दिनेश तायडे तसेच पोलीस बंदोबस्तात, महापालिकेच्या सर्व प्रभाग समितीचे सहाय्यक आयुक्त यांच्या उपस्थितीत करण्यात आली.
