यंदा हापूस आंब्याच्या अगोदर केसर आंब्यांनी साधला मुहूर्त
वाशी : वाशी मधील मुंबई कृषि उत्पन्न बाजार समिती (एपीएमसी) फळ बाजारात दरवर्षी नोव्हेंबर ते जानेवारी महिन्यात कोकणातील देवगड येथील हापूस आंब्याची मुहूर्ताची पहिली पेटी दाखल होते. मात्र, यंदा हापूस आंबा हंगामाला विलंब होणार असून, कोकणातील केसर आंब्यांनी हापूस आंब्याच्या आधीच मुहूर्त साधला आहे. ६ जानेवारी रोजी एपीएमसी फळ बाजारात केशर आंब्याची ५ डझनाची पहिली एक पेटी दाखल झाली आहे. केशर आंब्याची पहिली पेटी १७ हजार रुपये दराने विक्री झाली आहे.
दरवर्षी हापूस आंब्याची मार्चमध्ये आवक वाढण्यास सुरुवात होते. जानेवारी -फेब्रुवारी पासुन एपीएमसी फळ बाजारात हापूस आंबा दाखल होण्यास सुरुवात होते. त्यामुळे खवय्यांना हापूस आंब्याची चव चाखण्यासाठी मार्चपर्यंत वाट पहावी लागते. मात्र, त्याआधी एपीएमसी फळ बाजारात देवगड, रत्नागिरी येथील हापूस आंबा एपीएमसी फळ बाजारात दाखल होत असतो. मागील वर्षी देवगड येथील शिंदे कुटुंबीयांनी २१ नोव्हेंबर २०२४ रोजी एपीएमसी फळ बाजारात पहिली पेटी पाठवून मुहूर्त साधला होता. यंदा हापूस आंब्याला मोहोर फुटण्याची वेळ आणि अवकाळी पाऊस, कडाक्याची थंडी तसेच हवामान बदल आणि थ्रीप्स रोगाचा प्रादुर्भाव यामुळे फळधारणा न होता मोहोर देखील गळून पडला आहे. त्यामुळे यंदा बाजारात हापूस आंबा विलंबाने दाखल होणार आहे. मात्र, यंदा हापूस आंबा आधीच कोकणातूनच केसर आंब्याने नंबर लावत आंबा हंगाम सुरुवात करण्याचा मान पटकावला आहे. ६ जानेवारी रोजी देवगड तालुक्यातील वाघोटन मधील शेतकरी शकील मुल्ला यांनी आपल्या शेतातील केसर आंब्याची ५ डझनची पहिली पेटी एपीएमसी फळ बाजारात एन. डी. पानसरे अँड सन्स यांच्याकडे पाठवली होती. एपीएमसी फळ बाजारात हापूस आंब्याची पहिली पेटी दाखल होताच विधिवत पूजा करुन हापूस हंगामाचे स्वागत केले जाते. यंदा केसर आंबा पहिला दाखल झाल्याने त्याची विधिवत पूजा करण्यात आली. तसेच या आंबा हंगामातील पहिल्या पेटीला १६ ते १७ हजार रुपये बाजार भाव मिळाला आहे. आठ-आठ दिवसांनी केसर आंब्याची एपीएमसी फळ बाजारात आवक सुरु राहील, अशी माहिती व्यापारी संजय पानसरे यांनी दिली.
