नववर्षाच्या पार्श्वभूमीवर नवी मुंबई पोलीस सज्ज
नवी मुंबई : नववर्ष साजरा करीत असताना थर्टीफस्टच्या रात्री नवी मुंबई, पनवेल, उरण शहरात कुठल्याही प्रकारची अनुचित घटना घडू नये, यासाठी नवी मुंबई पोलिसांनी सर्वत्र चोख बंदोबस्त ठेवला आहे. नवी मुंबई पोलिसांकडून शहरातील हॉटेल, बार, ऑर्केस्ट्रा बार, रेस्टॉरंट, परमिट रुम तसेच फार्महाऊस, बंगले, समुद्र किनाऱ्यावर होणाऱ्या न्यु इयर पाटर्यांवर विशेष लक्ष ठेवण्यात येणार आहे. याशिवाय अंमली पदार्थांचे आणि विनापरवाना मद्य-फॉरेन लिकर पिणाऱ्यांवर देखील कायदेशीर कारवाई करण्याचे संकेत नवी मुंबई पोलिसांकडून देण्यात आले आहेत. त्यामुळे नागरिकांनी २०२५ या नूतन वर्षाचे स्वागत नियमांचे उल्लंघन न करता उत्साहाने आणि सुरक्षितपणे करावे, असे आवाहन नवी मुंबई पोलिसांद्वारे करण्यात आले आहे.
नवी मुंबई पोलिसांकडून थर्टीफस्ट आणि नववर्षाच्या पार्श्वभूमीवर शहरात मोठया प्रमाणात बंदोबस्त ठेवण्यात आला आहे. त्यासाठी अडीच हजार पोलीस अधिकारी-कर्मचारी, त्याशिवाय वाहतूक विभागाचे अधिकारी-कर्मचारी तैनात ठेवण्यात आले आहेत. यात ३ पोलीस उपआयुक्त, ६ सहाय्यक पोलीस आयुक्त, ५० पेक्षा अधीक पोलीस निरीक्षक, २०० सहाय्यक पोलीस निरीक्षक-पोलीस उपनिरीक्षक आणि १७०० पेक्षा अधीक पोलीस अंमलदारांचा समावेश आहे.
याशिवाय परिमंडळ स्तरावर आणि वाहतूक विभागाकडून नवी मुंबई शहराच्या प्रवेशद्वारावर, मुख्य चौकात, नाकाबंदी, पेट्रोलींग, फिक्स पाँईट तसेच निर्जन स्थळी चेकिंगचे पॉईंट लावण्यात येणार आहेत. नवी मुंबई मध्ये परिमंडळ स्तरावर ठेवण्यात आलेल्या बंदोबस्तावर पोलीस उपायुक्त तसेच सहाय्यक पोलीस आयुक्त विभाग स्तरावरुन देखरेख करण्यात येणार आहे. याचबरोबर गुन्हे शाखेकडून विविध आस्थापनांवर तसेच रेकॉर्डवरील गुन्हेगारांवर विशेष वॉच राहणार आहे. सागरी सुरक्षेच्या दृष्टीकोनातून सागरी किनाऱ्यांवर देखील पोलिसांचा विशेष बंदोबस्त तैनात ठेवण्यात येणार आहे.
थर्टीफस्ट दिवशी बार, हॉटेल्स आणि इतर आस्थापनांकडुन कुठल्याही प्रकारच्या नियमांचे उल्लंघन होणार नाही, याची काळजी घेण्याच्या सुचना नवी मुंबई पोलिसांनी दिल्या आहेत. तसेच नियमांचे उल्लंघन करणाऱ्या आस्थापनांवर कायदेशीर कारवाई करण्याचा इशारा पोलिसांकडून देण्यात आला आहे. नववर्षाच्या पार्श्वभुमीवर पनवेल, उरण परिसरात असलेल्या हॉटेल्स, रिसॉर्ट, फार्म हाऊस तसेच बंगल्यामध्ये मोठया प्रमाणात पाटर्या आणि रेव्ह पाटर्या होण्याची शक्यता आहे. याठिकाणी अंमली पदार्थाचा मोठया प्रमाणावर वापर होण्याची शक्यता असल्याने या पाटर्यांवर पोलिसांकडुन विशेष लक्ष ठेवण्यात येणार आहे.
सायन-पनवेल, ठाणे-बेलापूर महामार्गावर वाहतुक कोंडी होण्याची शक्यता लक्षात घेऊन वाहतुक नियमनासाठी विशेष खबरदारी घेतली जाणार आहे. वाहतुक नियंत्रणासाठी ठिक ठिकाणी वाहतुक पोलीस कर्मचारी तैनात ठेवले जाणार आहेत. त्यामुळे पोलिसांची अतिउत्साही पर्यटकांवर, मद्यपान करुन वाहन चालविणाऱ्या वाहन चालकांवर करडी नजर असणार आहे. त्यासाठी वाहतुक पोलिसांकडून ‘ड्रंक ऍन्ड ड्राईव्ह'ची विशेष मोहिम राबविण्यात येणार असून संशयित मद्यपी वाहन चालकाची वैद्यकीय तपासणी करण्यात येणार आहे. त्यात दोषी आढळणाऱ्यांवर दखलपात्र गुन्हे दाखल करण्यात येणार आहेत.
पोलिसांना माहिती देण्याचे आवाहन
३१ डिसेंबर २०२४ रोजी मद्य पिऊन वाहन चालवणाऱ्या व्यक्ती, सार्वजनिक ठिकाणी गोंधळ घालणाऱ्या, महिलांची छेडछाड करणाऱ्या, अनधिकृत मद्य विक्री करणाऱ्या, अंमली पदार्थाची विक्री करणाऱ्या, अंमली पदार्थांचे सेवन करणाऱ्यां व्यक्तींविरोधात कठोर कायदेशीर कारवाई करण्यात येणार आहे. नागरिकांनी बेवारस वस्तू, संशयित व्यक्ती, संशयित वाहन, मुलींची छेड काढणारे, अफवा पसरविणारे आदींची माहिती देण्यासाठी आणि पोलीस मदतीसाठी ११२ या हेल्पलाईनवर त्वरित संपर्क साधण्याचे आवाहन पोलिसांनी केले आहे.
थर्टीफस्ट रात्री नवी मुंबई, पनवेल, उरण शहरात कुठल्याही प्रकारची अनुचित घटना घडू नये, यासाठी पोलिसांचा सर्वत्र चोख बंदोबस्त ठेवण्यात आला असला तरी, नागरिकांनी थर्टीफस्ट साजरी करताना सतर्क रहावे. थर्टीफस्ट साजरी करणाऱ्यांनी मद्य प्राशन करुन वाहन चालवू नये, नागरिकांनी २०२५ या नूतन वर्षाचे स्वागत करताना इतरांना त्रास होणार नाही, याची काळजी घेऊन तसेच नियमांचे उल्लंघन न करता उत्साहाने आणि सुरक्षितपणे नूतन वर्षाचे स्वागत करावे. - मिलींद भारंबे, पोलीस आयुक्त - नवी मुंबई.
