‘सिडको' महागृहनिर्माण योजनेच्या नोंदणीसाठी पुन्हा मुदतवाढ
नवी मुंबई : ‘सिडको'ने माझे पसंतीचे घर या २६ हजार घरांच्या महागृहनिर्माण योजनेच्या ऑनलाईन अर्ज नोंदणीसाठी पुन्हा मुदतवाढ दिली आहे. त्यामुळे नागरिकांना या योजनेसाठी येत्या १० जानेवारी २०२५ पर्यंत नोंदणी करता येणार आहे. ‘सिडको'च्या या महागृहनिर्माण योजनेकरिता आतापर्यंत १ लाख २० हजारापेक्षा अधीक नागरिकांनी नोंदणी केली आहे.
‘सिडको'तर्फे १२ ऑक्टोबर रोजी दसऱ्याच्या मुहूर्तावर ‘माझे पसंतीचे सिडकोचे घर' या महागृहनिर्माण योजनेचा प्रारंभ करण्यात आला होता. या योजनेंतर्गत २६ हजार सदनिका प्रधानमंत्री आवास योजना मध्ये आर्थिकदृष्टया दुर्बल घटक आणि अल्प उत्पन्न गटाकरिता विक्रीसाठी उपलब्ध करुन देण्यात आल्या आहेत. नवी मुंबईतील वाशी, बामणडोंगरी, खारकोपर, खारघर, तळोजा, मानसरोवर, खांदेश्वर, पनवेल आणि कळंबोली नोडमध्ये या सदनिका उपलब्ध करुन देण्यात आल्या आहेत.
‘सिडको'च्या माझे पसंतीचे घर या महागृहनिर्माण योजनेतील घरासाठी आतापर्यंत १ लाख २० हजारापेक्षा अधिक नागरिकांनी नोंदणी केली आहे. या योजनेच्या नोंदणीसाठी २६ डिसेंबर पर्यंत मुदतवाढ देण्यात आली होती. परंतु, या गृहनिर्माण योजनेद्वारे अधिकाधिक नागरिकांना अर्ज करता यावा आणि आवश्यक त्या कागदपत्रांची जमवाजमव करता यावी याकरिता सदर योजनेच्या अर्ज नोंदणीला ‘सिडको'च्या वतीने पुन्हा मुदतवाढ देण्यात आली आहे.
त्यामुळे नागरिकांना या गृहनिर्माण योजनेकरिता १० जानेवारी २०२५ पर्यंत https://cidcohomes.com. या संकेतस्थळाला भेट देऊन ऑनलाईन नोंदणी करता येणार आहे. त्याचप्रमाणे अर्जदार अधिक माहितीसाठी ९९३०८७०००० आणि ८०६२३६८००० या हेल्पलाईन क्रमांकांवर संपर्क करु शकतात.
