एपीएमसी बाजारात प्रथमच मलावीतील केंट आंबा दाखल
वाशी : नवी मुंबईतील एपीएमसी फळ बाजारात मागील काही वर्षापासून आफ्रिका मधील मलावी आंबा दाखल होत आहे. डिसेंबर महिन्याच्या पहिल्या आठवड्यात मलावी हापूस आणि टॉमी अटकिन्स आंबा दाखल झाल्या नंतर शेवटच्या आठवड्यात मलावीतील केंट आंबा दाखल झाला आहे. त्यामुळे ग्राहकांना कोकणातील हाफुसच्या हंगामा पूर्वी परदेशी हापुसची चव चाखायला भेटत असल्याने ग्राहकांकडून या आंब्याला पसंती दिली जात आहे. एपीएमसी बाजारात पहिल्यांदाच केंट जातीचा आंबा आयात करण्यात आलेला आहे. सदर आंबा चवीला गोड असल्याची माहिती व्यापाऱ्यांनी दिली.
भारतातून विशेषतः कोकणातील हापूस आंब्याला परदेशात खूप मोठी मागणी असते. त्याचप्रमाणे परदेशी फळांना देखील भारतीय बाजारात मागणी असते. एपीएमसी बाजारात फेब्रुवारीमध्ये देशी हापूसचा हंगाम सुरू होतो. तर गेल्या काही वर्षांपासून आफ्रिकन मलावी आंबा दाखल एपीएमसी बाजारात होत आहे. मलावी आंबा चवीला कोकणातील हापूस सारखाच असल्याने याला देखील ग्राहकांकडून पसंती दिली जात आहे. नोव्हेंबर अखेरीस परदेशी मलावी हापूस दाखल होतो. दिवसेंदिवस याला मागणी वाढत आहे.
यंदा बाजारात मलावी हापूसचे उत्पादन ५० टक्के असल्याने आवक रोडावली होती. एपीएमसीत २४ डिसेंबर रोजी मलावीमधील केंट जातीचा नवीन आंबा पहिल्यांदाच आयात झाला आहे. बाजारात ३०० बॉक्स दाखल झाले असून तीन ते साडे तीन किलोला २७०० रुपये बाजारभाव होता. मलावी आंबा कोकणातील हापूस सारखा नसला तरी गुळगुळीत पोत, रसाळ आणि चवीला मधुर असल्याने त्याला ग्राहकांची पसंती आहे. येत्या १५ जानेवारीपर्यंत मलावी आंब्याचा हंगाम असणार आहे.
मुंबई कृषी उत्पन्न बाजार समितीत कोकणातील हापूस बरोबरच गेल्या काही वर्षांपासून इतर आंबेही दाखल होत आहेत. आफ्रिकन मलावी हापूस नंतर एपीएमसी बाजारात पहिल्यांदाच मलावीतील केंट प्रजातीचा आंबा दाखल झाला आहे. सदर आंबा चवीला गोड असल्याने अशा रसाळ आणि उत्कृष्ट आंब्याला ग्राहकांकडून पसंती दिली जात आहे.
-संजय पानसरे, संचालक-एपीएमसी फळ बाजार.
