‘थर्टीफर्स्ट'च्या रेव्ह पाटर्यांवर पोलिसांचा विशेष वॉच
नवी मुंबई : ख्रिसमस पासून ते ३१ डिसेंबर पर्यंत नववर्षाच्या स्वागतासाठी नागरिक हॉलिडे मुमध्ये असल्यामुळे दररोज विविध ठिकाणी मोठ्या प्रमाणात पाटर्यांचे आयोजन केले जाते. त्यात रेव्ह पार्ट्या देखील छुप्या पध्दतीने आयोजित केल्या जातात. या रेव्ह पाटर्यांमध्ये अंमली पदार्थांचे सर्रासपणे सेवन केले जाते. तसेच मद्यपींचा धुडगुसही मोठ्या प्रमाणात असतो. त्यामुळे ‘थर्टीफर्स्ट'पर्यंत शहरात कुठलीही अनुचित आणि अप्रिय घटना घडू नये, कायदा-सुव्यवस्था अबाधित रहावी यासाठी नवी मुंबई पोलिसांची अशा पाटर्यांच्या आयोजनावर करडी नजर असल्याचे गुन्हे शाखाचे पोलीस उपायुक्त अमित काळे यांनी सांगितले.
ख्रिसमस शांततेत पार पडल्यानंतर आता नववर्ष स्वागतासाठी आणि त्या अनुषंगाने आवश्यक बंदोबस्तासाठी नवी मुंबई पोलिसांची मोर्चेबांधणी सुरु झाली आहे. ख्रिसमस पासून ‘थर्टीफर्स्ट'पर्यंत दररोज ठिकठिकाणी पाटर्यांचे आयोजन केले जात असून अनेक पाटर्यांमध्ये अंमली पदार्थाचा वापर होत असल्याची बाब पोलिसांच्या निदर्शनास आली आहे. त्यामुळे अंमली पदार्थ पुरविणाऱ्या तस्करांची माहिती काढण्यासाठी पोलिसांचे खबऱ्यांचे नेटवर्क देखील कामाला लागले आहे.
नवी मुंबई पोलीस आयुक्तालय क्षेत्रांतर्गत नवी मुंबई आणि पनवेल परिसरातील हॉटेल्स, धाबे, कॉटेजेस, फार्म हाऊस, जंगल परिसरातील पाटर्यांची ठिकाणे, समुद्र किनारपट्टीची ठिकाणे येथे अनुचित प्रकार अथवा गैरकृत्य होणार नाही, याकडे पोलिसांकडून लक्ष दिले जात आहे. त्यातही विशेष करुन चोरीछुपे आयोजित केल्या जाणाऱ्या रेव्ह पाटर्यांवर पोलिसांची करडी नजर असते.
रेव्ह पाटर्यांमध्ये अंमली पदार्थाचा वापर मोठ्या प्रमाणात होत असल्यामुळे अंमली पदार्थाची तस्करी देखील मोठ्या प्रमाणात वाढते. मागील काही वर्षात ख्रिसमस आणि नववर्ष स्वागताच्या काळात नवी मुंबई पोलिसांनी कोकेन, एमडी, एलएसडी यासारखे अंमली पदार्थ मोठ्या प्रमाणात छापे मारुन पकडले आहेत. नुकतीच नवी मुंबई पोलिसांनी विशेष मोहीम राबवून अंमली पदार्थाची तस्करी करणाऱ्या १६ नायजेरीयन नागरिकांची धरपकड केली आहे.
तसेच त्यांच्याकरुन तब्बल १२ कोटी रुपये किंमतीचे वेगवेगळ्या प्रकारचे अंमली पदार्थ जप्त केले आहेत. पोलिसांची सदर विशेष मोहिम ‘थर्टीफर्स्ट'पर्यंत सुरु राहणार आहे.
-अमित काळे, पोलीस उपायुक्त-गुन्हे शाखा, नवी मुंबई.
