विशेष मुलांच्या कलाविष्काराने दिव्यांग दिन साजरा
ठाणे : जागतिक दिव्यांग दिन सर्वत्र ३ डिसेंबर रोजी साजरा करण्यात आला. या पार्श्वभूमीवर ठाणे महापालिका तर्फे १७ डिसेंबर रोजी डॉ. काशिनाथ घाणेकर नाट्यगृह येथे दिव्यांग दिन साजरा करण्यात आला. याप्रसंगी महापालिका आयुवत सौरभ राव, अतिरिक्त आयुक्त-२ प्रशांत रोडे, उपायुक्त उमेश बिरारी, जी. जी. गोदेपुरे, अनघा कदम, कार्मिक अधिकारी दयानंद गुंडप, जिद्द शाळेच्या मुख्याध्यापिका अर्चना शेटये, दिव्यांग कला केंद्राचे किरण नाक्ती यांच्यासह दिव्यांग मुलांचे पालक मोठ्या संख्येने उपस्थित होते.
या निमित्ताने आदित्य प्रतिष्ठान ठाणे यांच्या संयुक्त विद्यमाने आयोजित दिव्यांग कला केंद्र ठाणे प्रस्तुत अरेरे ते अरेव्वा.. या विशेष मुलांचा कलाविष्कार रसिकांना पाहावयास मिळाला.
यावेळी आयुक्त सौरभ राव यांनी विद्यार्थ्यांनी सादर केलेल्या कार्यक्रमाचे कौतुक केले. दिव्यांग मुलांनी सादर केलेले नृत्य, गाणी यावर रसिकांनीही एकच ठेका धरला. गणेश वंदना, सत्यम शिवम्सुंदरम, डिपाडी डिपांग.., वाजले की बारा.. अभंग, कोळीगीते यासह विविध गाणी दिव्यांग कला केंद्राच्या विशेष मुलांनी सादर केले. यावेळी दृष्टीहीन वादकांनी गाण्यांना साथ-संगत केली. विशेष मुलांनी सादर केलेल्या नृत्याविष्काराला रसिकांनी चांगलीच दाद दिली. तसेच दृष्टिहीन गायक- गायिकांनी अवीट गोडीची गाणी सुरेल आवाजात गात रसिकांना मंत्रमुग्ध केले.
दरम्यान, दिव्यंगत्वावर मात करीत कलागुण सादर करणाऱ्या विशेष मुलांना आत्मनिर्भर बनविण्यासाठी निश्चितपणे महापालिका त्यांच्या पाठीशी उभी राहिल. संवेदनशील अशी सदर विशेष मुले असून त्यांना विविध खेळांमध्ये सहभागी करुन घेण्याच्या दृष्टीनेही महापालिका प्रयत्न करेल असे नमूद करीत महापालिका आयुक्त सौरभ राव यांनी सर्व विशेष मुलांना, त्यांच्या पालकांना जागतिक दिव्यांग दिनाच्या शुभेच्छा दिल्या.
तत्पूर्वी अतिरिक्त आयुक्त प्रशांत रोडे यांनी कार्यक्रमाचे प्रास्ताविक केले. विशेष मुलांमधील कलागुणांना वाव देण्यासाठी महापालिकेच्या माध्यमातून दरवर्षी या कार्यक्रमाचे आयोजन केले जाते. दिव्यांगांना मुख्य प्रवाहात आणणे, असा या मागील हेतू असून यासाठी महापालिका सतत प्रयत्नशील असल्याचे रोडे यांनी यावेळी नमूद केले.
कार्यक्रमाचे सूत्रसंचालन राजेंद्र पाटणकर यांनी केले.
