मुंबई विद्यापीठ उपकेंद्रात विद्यार्थिनींची सुरक्षितता वाऱ्यावर
ठाणे : ‘मुंबई विद्यापीठ'च्या ठाणे उपकेंद्राच्या परिसरात विद्यापीठ विधी अभ्यासक्रमाचे शिक्षण घेणाऱ्या ३ विद्यार्थिनींना अनेक दिवस बलात्काराच्या धमक्या तसेच अश्लिल मजकूर असलेली पत्रे त्यांच्या वर्ग खोलीत आणि बॅगेत आढळून आलेली आहेत. ५ डिसेंबर रोजी या सर्व प्रकाराबाबत संबंधित विद्यार्थिनींनी ठाणे उपकेंद्राच्या प्रमुखांकडे तक्रार केली असता केंद्र प्रमुख लेखी तक्रार घ्यायला तयार नव्हते. याबाबत विद्यार्थिनींचे पालक उपकेंद्राच्या प्रमुखांना जाऊन भेटले. तसेच त्यांचा स्थानिक पोलीस ठाणेमध्ये फक्त जबाब नोंदवण्यात आला. यावेळी देखील उपकेंद्र प्रमुख अथवा कोणी प्राध्यापक विद्यार्थीनी सोबत उपस्थित नव्हते.
सदर प्रकरणाचे गांभीर्य लक्षात घेऊन पोलीस आणि विद्यापीठातील वरिष्ठ अधिकाऱ्यांनी तात्काळ कारवाई करणे अपेक्षित होते. याउलट उपकेंद्र प्रमुख विद्यार्थिनींवर दबाव टाकत असून सदर प्रकरण मिटवू पाहत आहेत. यामुळे उपकेंद्राच्या परिसरात भितीचे वातावरण निर्माण झाले आहे, अशी तक्रार अभाविप ठाणे शाखेकडे करण्यात आली आहे.
सदर घटनेला ७ दिवस होऊन गेले असता यावर ठोस कारवाई केल्याचे दिसून येत नाही. मुंबई विद्यापीठ सारख्या ठिकाणी अशा पध्दतीचे घृणास्पद आणि निंदनीय प्रकार घडतात, हीच गोष्ट अतिशय लज्जास्पद आहे. विद्यापीठाच्या लेखी विद्यार्थ्यांना किती किंमत आहे, असे यातून दिसून येते. यामध्ये काही पालक विद्यार्थिनीचे प्रवेश रद्द करत असून यामुळे विद्यार्थिनींचे शैक्षणिक नुकसान होणार आहे. १२ डिसेंबर पर्यंत विद्यापीठाच्या वरिष्ठ अधिकाऱ्यांना देखील या प्रकाराबाबत कुठलीही माहिती नव्हती. ‘अभाविप'ने कुलगुरु यांची भेट घेत त्यांना सदर सर्व प्रकार लक्षात आणून दिला. त्यानंंतर कुलगुरुंनी यावर चौकशी समिती नेमण्याचे आश्वासन दिले आहे . या सर्व प्रकारामुळे विद्यार्थीनींमध्ये भितीचे वातावरण असून विद्यापीठाने सर्व विद्यार्थिनींना विश्वासात घेणे आवश्यक आहे .
या प्रकाराचे गांभीर्य लक्षात घेऊन याची उच्चस्तरीय चौकशी होऊन दोषींवर कठोर कारवाई व्हायला हवी. तसेच कारवाई न करणाऱ्या उपकेंद्र संचालकांवर योग्य पध्दतीने कारवाई झाली पाहिजे, असे ‘अभाविप'चे प्रदेशमंत्री संकल्प फळदेसाई यांनी सांगितले. तर अशा घटना वारंवार घडू नयेत यासाठी प्रशासनाने योग्य ती पावले उचलणे गरजेचे असल्याचे मत ठाणे महानगर मंत्री योगेश दामले यांनी व्यक्त केले आहे.
