विना परवानगी आठवडा बाजार, अनधिकृत हातगाड्यांवर कारवाई करण्याची मागणी
आ. प्रशांत ठाकूर यांचे महापालिका आयुक्तांना निवेदन
पनवेल : पनवेल महापालिका हद्दीतील विना परवानगी आठवडा बाजार आणि अनधिकृत हातगाड्यांवर कारवाई करण्याची मागणी आमदार प्रशांत ठाकूर यांनी पनवेल महापालिका आयुक्त मंगेश चितळे यांची भेट घेऊन, त्यांना निवेदन देऊन केली आहे. यावेळी माजी पनवेल महापालिका सभागृह नेते परेश ठाकूर, माजी स्थायी समिती सभापती अमर पाटील आदी उपस्थित होते.
पनवेल महापालिका हद्दीत ठिकठिकाणी आठवडा बाजार चालतात. सदर आठवडा बाजार महापालिका प्रशासनाची कोणतीही अधिकृत परवानगी न घेता काही लोकांच्या दादागिरीने अवैधपणे चालविले जात असल्याचे आणि काही महापालिका अधिकारी या आठवडा बाजारकडे हेतुपुरस्सर दुर्लक्ष करत असल्याचे निदर्शनास आले असून, स्थानिक नागरिकांकडून तसेच अधिकृत व्यावसायिकांकडून तक्रारी येत आहेत. तसेच अवैधपणे कोणतीही परवानगी अथवा परवाना न घेता रस्त्यावर हातगाड्यांवर धंदे करण्यात येत आहेत. सदर हातगाड्यांमुळे रस्त्यावर वाहतुकीस अडथळा निर्माण होत असून, हातगाड्यांवर व्यवसाय करणारे मोठ्या प्रमाणावर बांग्लादेशी लोक असल्याच्या नागरिकांच्या तक्रारी आहेत. याशिवाय आठवडा बाजार आणि हातगाड्यांवर अनैतिक धंदे चालत असल्याच्या तक्रारीही येत आहेत. नागरिकांकडून वेळोवेळी अवैध आठवडा बाजार आणि हातगाड्या यासंदर्भातील तकारी महापालिकेकडे करण्यात आल्या आहेत. परंतु, महापालिका अधिकाऱ्यांकडून नागरिकांच्या तक्रारीला केराची टोपली दाखविली जात असल्याची भावना नागरिकांमध्ये झाली आहे. सदर विना परवानगी आठवडा बाजार आणि अवैधपणे चालणाऱ्या हातगाड्यांवर अतिशय संथगतीने चालू असलेली कारवाई जलदगतीने पूर्ण करण्याची गरज आहे. कोणाच्याही दबावाला बळी न पडता अनधिकृत आठवडा बाजार आणि हातगाडयांवर पूर्णपणाने कारवाई करावी, असे आमदार प्रशांत ठाकूर यांनी निवेदनात नमूद केले आहे.
पनवेल महापालिका हद्दीतील विना परवानगी आठवडा बाजार आणि अनधिकृत हातगाड्यांवर कारवाई न झाल्यास येत्या १ जानेवारी २०२५ पासून महापालिकेच्या विरोधात व्यापक आंदोलन करण्यात येईल, असा इशाराही आमदार प्रशांत ठाकूर यांनी निवेदनात दिला आहे.
