पाणी बिल थकबाकी ; १७८० नळ जोडण्या खंडित
३३५४ थकबाकीदारांना नोटीस
आतापर्यंत ५९.४३ कोटी रुपये वसुली
ठाणे : ठाणे महापालिकेची पाणी बिल थकबाकी वसुलीकरता पाणी पुरवठा विभागाने मोठ्या प्रमाणात कारवाई सुरु केली आहे. या मोहिमेत संपूर्ण महापालिका क्षेत्रात आतापर्यंत १७८० नळ जोडण्या खंडित करण्यात आल्या असून, १५२ मोटर पंप जप्त करण्यात आले आहेत. याशिवाय एकूण ५० पंप रुम सील करण्यात आले असून, पाणी बिल थकबाकी वसुलीसाठी ३३५४ थकबाकीदार ग्राहकांना नोटीस पाठवण्यात आली आहे. या पाणी बिल वसुली अभियानात आतापर्यंत सुमारे ५९.४३ कोटी रुपयांची वसुली करण्यात आली आहे.
ठाणे महापालिकेची पाणी बिल रक्कम सुमारे २२४ कोटी रुपयांच्या घरात आहे. त्यापैकी, ७६ कोटी रुपये पाणी बिल थकबाकी असून, चालू वर्षाची बिल रक्कम १४८ कोटी रुपये आहे. पाणी बिलाची थकबाकी न भरल्यास नळ जोडणी खंडित करुन पाणी पुरवठा बंद करण्याची कारवाई महापालिका तर्फे करण्यात आली आहे. ठाणे महापालिका आयुक्त सौरभ राव यांनी याबाबत स्पष्ट निर्देश दिले आहेत. तसेच, आयुक्तस्तरावर पाणी बिल वसुलीबाबत सातत्याने आढावाही घेतला जात आहे.
महापालिका अतिरिक्त आयुक्त संदीप माळवी यांनी पाणी बिलाच्या साप्ताहिक वसुलीचे लक्ष्य निर्धारित करुन पाणी बिल वसुली अभियान सुरु करण्यास सांगितले आहे. त्यानुसार, पाणी बिलाच्या थकबाकीसह वसुलीसाठी महापालिकेच्या सर्व प्रभागात नळ जोडणी खंडीत करण्याची, मोटर पंप जप्त करण्याची, मीटर रुम सील करण्याची कारवाई करण्यात येत आहे. याशिवाय पाणी बिलाचा भरणा न करता, खंडित नळ जोडणी परस्पर पुन्हा कार्यान्वित करुन घेतल्यास गुन्हे दाखल करण्याचे निर्देश देण्यात आले आहेत.
प्रभाग समितीतील पाणी पुरवठा विभाग अभियंत्यांच्या नेतृत्वात पाणी बील वसुलीची मोहीम राबविण्यात येत असून, कारवाईत हयगय करू नये, असे त्यांना निर्देश देण्यात आले आहे. नागरिकांनी पाणी बिल वेळेत भरले नाही तसेच थकबाकीदारांनी बील भरुन ठाणे महापालिकेस सहकार्य केले नाही तर नळ जोडणी खंडित करण्यात येईल, असे ठाणे महापालिका उपनगर अभियंता (पाणी पुरवठा) विनोद पवार यांनी स्पष्ट केले आहे.
प्रभाग कारवाई वसुली
माजिवडा-मानपाडा : ८० - ११,३८,१३,५७२/- रुपये
नौपाडा कोपरी : १०० - ०७,७९,१४,४५८/- रुपये
वर्तकनगर : ८९ - ०५,९८,१५,४६७/- रुपये
उथळसर : १४९ - ०५,४१,४९,२१५/- रुपये
कळवा : १८२ - ०५,२०,२३,४७३/- रुपये
वागळे : ३५४ - ०२,८२,९५,०७८/- रुपये
लोकमान्य- सावरकर : १७८ - ०४,४६,६८,५८७/- रुपये
मुंब्रा ; ३३३ - ०४,९५,९३,१०३/- रुपये
दिवा : ३१५ - ०४,८०,१०,९८५/- रुपये
मुख्यालय-सीएफसी ०० - ०६,६०,७१,८६९/- रुपये
.........................................................................
एकूण : १७८० - ५९,४३,५५,८०७/- रुपये
थकीत बिलावरील प्रशासकीय आकारात सूट
ठाणे महापालिका कार्यक्षेत्रातील घरगुती वापरासाठी असलेल्या नळ संयोजनाच्या थकीत देयकाची चालू वर्षाच्या मागणीसह पूर्ण भरणा केल्यास प्रशासकीय आकारामध्ये १०० टक्के सूट लागू करण्यास महापालिका आयुक्त सौरभ राव यांनी मान्यता दिली आहे. थकीत पाणीपट्टी बिलावरील दंडात १०० टक्के इतकी भरीव सवलत जाहीर करण्यात आल्याने नागरिकांना आर्थिक दिलासा मिळणार असून या योजनेचा लाभ नागरिकांनी घ्यावा, असे आवाहन महापालिका तर्फे करण्यात आले आहे.
सदर योजना १ सप्टेंबर २०२४ ते ३१ मार्च २०२५ या कालावधीत लागू राहणार आहे. सदर योजनेचा लाभ घेऊन थकीत आणि चालू पाणी देयकाची रक्कम पूर्णपणे भरुन त्यावरील प्रशासकीय आकारामध्ये १०० टक्के सवलत योजनेचा लाभ नागरिक घेवू शकणार आहेत. या धोरणात्मक निर्णयापूर्वी ज्या घरगुती पाणी बील धारकांनी पाणी पुरवठा देयके जमा केली असतील त्यांना सदरची सवलत योजना लागू असणार नाही. तसेच सदर सवलत योजना व्यवसायिक संयोजन धारकांना लागू असणार नाही, असे महापालिका अतिरिक्त आयुक्त संदीप माळवी यांनी स्पष्ट केले आहे.
