राजकीय पक्षांना आचारसंहिता, निवडणूक खर्चाविषयी मार्गदर्शन
आयोगाच्या मार्गदर्शक सूचनांप्रमाणेच निवडणूक खर्च करण्याचे आवाहन
ठाणे : आचारसंहिता लागू झाल्याने काय करावे, काय करु नये, नामनिर्देशनपत्र कसे भरावे, याबाबत जिल्हा निवडणूक निर्णय अधिकारी तथा जिल्हाधिकारी अशोक शिनगारे यांनी राजकीय पक्षांच्या प्रतिनिधींची बैठक घेऊन त्यांना सविस्तर मार्गदर्शन केले. दरम्यान, सर्वांनी ‘आचारसंहिता'चे काटेकोर पालन करावे. तसेच ‘निवडणूक आयोग'च्या मार्गदर्शक सूचनांप्रमाणेच निवडणूक खर्च करावा, असे आवाहन जिल्हाधिकारी शिनगारे यांनी ठाणे येथे केले.
‘विधानसभा र्सावत्रिक निवडणूक-२०२४'च्या पार्श्वभूमीवर ठाणे जिल्हाधिकारी तथा जिल्हा निवडणूक अधिकारी अशोक शिनगारे यांच्या अध्यक्षतेखाली १६ ऑवटोबर रोजी विविध राजकीय पक्षांच्या प्रतिनिधींची बैठक समिती सभागृहात आयोजित करण्यात आली होती, त्यावेळी ते बोलत होते.
याप्रसंगी जिल्हा परिषद मुख्य कार्यकारी अधिकारी रोहन घुगे, आचारसंहिता कक्ष प्रमुख तथा नोडल अधिकारी विजयसिंह देशमुख, उप जिल्हा निवडणूक अधिकारी वैशाली माने, एमसीएमसी कमिटी सदस्य सचिव तथा नोडल अधिकारी (माध्यम कक्ष) मनोज शिवाजी सानप, खर्च नियंत्रण समितीचे नोडल अधिकारी सत्यवान उबाळे, दिलीप सूर्यवंशी, वैजनाथ बुरुडकर, आचारसंहिता कक्ष सहायक नोडल अधिकारी सुकेशिनी पगारे, तहसिलदार सायली भगत, प्रदीप कुडाळ आणि विविध राजकीय पक्षांचे प्रतिनिधी उपस्थित होते.
‘भारत सरकार'च्या पोर्टलवर याबाबत सर्व सविस्तर माहिती आहे. त्याचाही संदर्भ म्हणून वापर करावा. विशेषतः नामनिर्देशनपत्राबाबत आवश्यक ती सर्व दक्षता घ्यावी. वयस्कर तसेच दिव्यांग मतदारांसाठी मतदान केंद्रांवर आवश्यक त्या सुविधा करण्यावर भर दिला आहे. राजकीय पक्षांनी बुथनिहाय प्रतिनिधी नेमावेत. सर्वांनी ‘आचारसंहिता'चे काटेकोर पालन करावे, असे जिल्हाधिकारी शिनगारे म्हणाले.
तक्रारीसाठी टोल फ्री क्रमांक १९५०
लाच देणे, अवाजवी प्रभाव टाकणे, मतदारांना धाकदपटशा दाखविणे याबाबत काही तक्रारी असतील तर जिल्ह्याच्या तक्रार संनियंत्रण कक्षातील १९५० या टोल फ्री क्रमांकावर माहिती द्यावी. सदर कक्ष २४ तास सुरु आहे. राजकीय पक्षांनी ‘निवडणूक आयोग'च्या विविध ॲप्सच्या सुविधांचा लाभ घ्यावा. तसेच नागरिकांनाही या ॲप्सचा वापर करण्यासाठी प्रोत्साहित करावे, असे आवाहन जिल्हाधिकारी शिनगारे यांनी केले.
यानंतर उपस्थित राजकीय पक्षांच्या प्रतिनिधींना आचारसंहिता कक्ष प्रमुख तथा नोडल अधिकारी विजयसिंह देशमुख यांनी ‘आचारसंहिता'मध्ये काय करावे, काय करु नये याबाबत मार्गदर्शन केले. यावेळी त्यांच्यासह आचारसंहिता कक्ष सहायक नोडल अधिकारी सुकेशिनी पगारे उपस्थित होत्या.
माध्यम प्रमाणिकरण आणि संनियंत्रण समिती सदस्य सचिव तथा नोडल अधिकारी (माध्यम कक्ष) मनोज शिवाजी सानप यांनी माध्यम प्रमाणिकरण आणि संनियंत्रण समिती अंतर्गत होणाऱ्या कामकाजाबाबत मार्गदर्शन केले. तर निवडणूक संबंधीच्या खर्चाबाबत नवी मुंबई महापालिका मुख्य लेखा-वित्त अधिकारी सत्यवान उबाळे यांनी सविस्तर माहिती दिली. त्यांच्यासह सदर बैठकीस ठाणे महापालिका मुख्य लेखा-वित्त अधिकारी दिलीप सूर्यवंशी, ‘ठाणे जिल्हा परिषद'चे मुख्य वित्त-लेखा अधिकारी वैजनाथ बुरडकर उपस्थित होते.
