‘टीएमटी'च्या प्रवाशांसाठी मोबाईल ॲपद्वारे तिकीट सुविधा
ठाणे: ठाणे परिवहन सेवेच्या प्रवाशांना विविध सुविधा उपलब्ध करुन देणाऱ्या ‘माझी टीएमटी' (Mazi TMT) या मोबाईल ॲपचे मुख्यमंत्री एकनाथ शिंदे यांच्या हस्ते नुकतेच लोकार्पण करण्यात आले. या ॲपमुळे प्रवाशांना युपीआयद्वारे डिजीटल तिकीट काढण्याची सुविधा मिळणार आहे. सध्या सदर सुविधा काही बसमार्गावर सुरु करण्यात आली आहे. नंतर ती टप्प्याटप्प्याने ‘टीएमटी'च्या सर्व बसमार्गांवर प्रवाशांना वापरता येणार आहे.
मुख्यमंत्री एकनाथ शिंदे यांनी ११ ऑक्टोबर रोजी धर्मवीर आनंद दिघे वाचनालय आणि अभ्यासिकाचे लोकार्पण केले. त्याच ठिकाणी ठाणे महापालिका परिवहन सेवेच्या ‘माझी टीएमटी' या मोबाईल ॲपचेही लोकार्पण करण्यात आले. या मोबाईल ॲपद्वारे तिकिट काढण्याची पध्दत, बसमधील वाहकाकडून त्याचे केले जाणारे व्हेरिफिकेशन याचा डेमो यावेळी मुख्यमंत्री शिंदे यांनी पाहिला. प्रवाशांसाठी सदरची चांगली सुविधा असल्याचे प्रतिपादन मुख्यमंत्री शिंदे यांनी यावेळी केले. सदर कार्यक्रमप्रसंगी खासदार नरेश म्हस्के, आमदार प्रताप सरनाईक, महापालिका आयुक्त सौरभ राव, अतिरिक्त आयुक्त संदीप माळवी, अतिरिक्त आयुक्त प्रशांत रोडे, ‘टीएमटी'चे व्यवस्थापक भालचंद्र बेहरे, माजी नगरसेवक विकास रेपाळे, नम्रता भोसले, आदि उपस्थित होते.
सदर मोबाईल ॲपद्वारे प्रवाशांना युपीआय वापरुन डिजीटल तिकीट काढता येईल. तसेच डेबीट कार्ड, क्रेडिट कार्ड, नेट बँकिंगचा वापर करुन पैसे भरता येतील. त्याचप्रमाणे प्रवाशांना बस कोठे आणि किती वेळेत स्टॉपवर येणार याची माहिती देण्याची सुविधाही या ॲपमध्ये आहे. प्रवाशांना ॲपवर प्रवासाच्या सुरुवातीचे ठिकाण आणि गंतव्य स्थान यांची माहिती भरुन बसमार्ग, त्या मार्गावरील उपलब्ध बसगाड्या, त्यासाठी लागणारे तिकीट भाडे याचीही माहिती मिळणार आहे.
डिजीटल तिकिटांच्या व्यवस्थेमुळे वाहकांची रोख रक्कम हाताळण्याची संख्या कमी होईल. सुटे पैसे नसल्याने प्रवासी आणि वाहक यांच्यात होणारे वाद यामुळे टळतील, अशी अपेक्षाही टीएमटी व्यवस्थापनाला आहे. सध्या ॲपद्वारे तिकिटांची सुविधा काही बसमार्गावर सुरु करण्यात आली आहे. ती टप्प्याटप्प्याने ‘टीएमटी'च्या सर्व बसमार्गांवर प्रवाशांना वापरता येणार असल्याचे टीएमटी व्यवस्थापनाने सांगितले.
