कोप्रोली प्राथमिक शाळेची दुरावस्था
उरण : कोप्रोली ग्रामपंचायत हद्दीतील जिल्हा परिषद प्राथमिक शाळेची दुरवस्था झाली आहे. त्यात शाळेचा पायाच ढासळू लागल्याने शिक्षण विभागाच्या दुर्लक्षित पणामुळे जीव मुठीत धरुन विद्यार्थ्यांना शिक्षण घ्यावे लागत आहे. त्यामुळे या शाळेचे स्ट्रक्चरल ऑडिट करुन विद्यार्थ्यांच्या जीवितास धोका निर्माण होणार नाही ना? याची खातरजमा करावी, अशी मागणी पालक वर्गाकडून करण्यात येत आहे.
२५ सप्टेंबर १९३० सालच्या चिरनेर जंगल सत्याग्रहात हिरीरीने सहभाग घेणारे उरण तालुक्यातील कोप्रोली गांव आहे. या गावातील मुलांना दर्जेदार शिक्षण मिळावे यासाठी ब्रिटीश सरकारच्या काळात दगडी शाळेच्या इमारतीची उभारणी करण्यात अली होती. मात्र, सुसज्ज अशा दगडी शाळेच्या इमारतीचे बांधकाम पाडून सर्व शिक्षण अभियान आणि आँल काँर्गो ग्लोबल लाँ. पा. या प्रकल्पाअंतर्गत सुमारे ४५ लाख ६३ हजार रुपये खर्च करुन ठेकेदारांच्या माध्यमातून प्राथमिक शाळेची इमारत उभी केली गेली. मात्र, नित्कृष्ठ दर्जाच्या कामामुळे इमारतीच्या स्लँबला गळती लागून प्लास्टर गळू लागले. यावर उपाय म्हणून पुन्हा लाखो रुपये खर्च करुन शाळेच्या इमारतीवर पत्र्यांचे छेड बांधण्यात आले.
मात्र, शिक्षण विभागाच्या आंधळं दळतंय आणि कुत्र पिट खातयं या म्हणी प्रमाणे सध्या इमारतीचा पाया, भिंती जीर्ण झाल्या असून पडण्याच्या स्थितीत आहेत. त्यामुळे विद्यार्थ्यांना शिक्षण घेताना अनेक अडचणींचा सामना करावा लागत आहे. शाळेची इमारत पडली तर शाळेत अभ्यासाचे धडे गिरविणाऱ्या विद्यार्थ्यांच्या जीवितास धोका निर्माण होऊ शकतो, अशी भिती रहिवासी व्यक्त करीत आहेत. त्यामुळे शाळेच्या इमारतीचे स्ट्रक्चरल ऑडिट करण्याची मागणी जोर धरु लागली आहे.
माझ्याकडे शाळेच्या इमारतीसंदर्भांत कोणत्याही प्रकारची तक्रार आलेली नाही. शाळेचे बांधकाम जीर्ण झाले आहे. दुरुस्तीसाठी निधी मिळविण्यासाठी प्रयत्न केले जात आहेत.
-सौ. प्रियांका पाटील, प्र.गटशिक्षण अधिकारी, पंचायत समिती उरण.
कोप्रोली प्राथमिक शाळेच्या जीर्ण झालेल्या इमारतीच्या बांधकामासंदर्भात वरिष्ठांकडे तक्रार दाखल करण्यात आली नाही. शाळेच्या इमारतीच्या दुरुस्तीसाठी आमदार निधीतून ७ लाख रुपये मंजूर झाले आहेत. -सतिश शेंडगे, मुख्याध्यापक-प्राथमिक शाळा, कोप्रोली.
