खा. नरेश म्हस्के यांची केंद्रिय समितीवर निवड
मुंबई : केंद्र सरकारच्या ‘गृहनिर्माण-नागरी व्यवहार समिती'च्या स्थायी समिती सदस्यपदी ‘ठाणे'चे खासदार नरेश म्हस्के यांची नेमणूक करण्यात आली आहे.
देशाच्या शहरी योजनांमध्ये योगदान देण्याची संधी मला मिळाली, हीच माझ्यासाठी अत्यंत अभिमानाची गोष्ट असल्याची भावना खा. नरेश म्हस्के यांनी व्यक्त करत मुख्यमंत्री एकनाथ शिंदे आणि लोकसभा मधील शिवसेना गटनेते डॉ. श्रीकांत शिंदे यांचे आभार मानले आहेत.
सदर ‘समिती'मध्ये देशातील शहरी योजनांवर (उदा. मेट्रो, स्मार्ट सिटी, स्वच्छ भारत योजना, पंतप्रधान आवास योजना, अमृत योजना, परिवहन) विविध अर्थसंकल्प आणि शहरी विकास योजनांबाबत चर्चा करुन निर्णय घेतले जातात.
‘समिती'ची पहिली बैठक समिती अध्यक्ष मागुंता श्रीनिवासुलु रेड्डी यांच्या अध्यक्षतेखाली दिल्लीच्या संसद भवनात झाली. यावेळी शहरी वाहतुकीच्या समस्यांवर खासदार म्हस्के यांना मत मांडण्याची संधी मिळाली.
महापालिकांना सध्या होत असलेल्या आर्थिक तोट्यामुळे सार्वजनिक वाहतूक व्यवस्था कमकुवत होत चालली आहे. कोव्हीड काळात महापालिकांची आर्थिक स्थिती अत्यंत वाईट झाली आहे. त्यामुळे वाहतुकीवर परिणाम होत आहे. शहरी वाहतुकीच्या अनुषंगाने पंतप्रधानांनी दिलेल्या इलेक्ट्रिक बसेससाठी अधिक अनुदान वाढवण्याची गरज आहे, असे मत खा. नरेश म्हस्के यांनी यावेळी मांडले.
शहरी वाहतुकीप्रमाणेच ‘स्मार्ट सिटी योजनां'मध्ये सुरु असलेल्या कामांची देखील केंद्र सरकारने योग्य तपासणी करणे गरजेचे आहे. लोकप्रतिनिधींनी या योजनांमध्ये थेट सहभाग घेतला पाहिजे. अशा प्रकल्पांमध्ये लोकप्रतिनिधींचा सहभाग असणे, निर्णय प्रक्रियेत त्यांचा सहभाग असणे गरजेचे असल्याचे खासदार म्हस्के यांनी सभागृहाच्या निदर्शनास आणून दिले.
भारतातील नागरी नियोजनाला अधिक परिणामकारक बनवण्यासाठी उत्कृष्ट केंद्रे विकसित करण्यावर विशेष लक्ष केंद्रित करणं गरजेचे आहे. ज्यामुळे अशा केंद्रांद्वारे शहरी नियोजन, संशोधन, आणि शिक्षण याला चालना देऊन, शहरांचे दीर्घकालीन आणि शाश्वत विकासाचे उद्दिष्ट साध्य होईल. शहरी भागात जमीन सुधारणांच्या अंमलबजावणीचा आढावा आणि तंत्रज्ञानाच्या माध्यमातून विकासाचं नवीन पर्व उलगडण्यासाठी ‘राष्ट्रीय शहरी डिजिटल मिशन'चे पुनरावलोकन आणि अंमलबजावणी करावी, अशी सूचना खासदार म्हस्के यांनी ‘समिती'ला केली.
