शिवसेना उपनेते विजय नाहटा पदाधिकारी-कार्यकर्त्यांसह आई एकविरा चरणी
नवी मुंबई : गेल्या अनेक वर्षापासून प्रलंबित असलेला नवी मुंबईमधील प्रकल्पग्रस्त बांधवांचा गरजेपोटी घरे नियमित करण्याचा प्रश्न शासनाच्या माध्यमातून आता लवकरच मार्गी लागणार असल्याने येथील स्थानिक प्रकल्पग्रस्तांमध्ये आनंदाचे वातावरण आहे. त्याअनुषंगाने नवी मुंबई मधील स्थानिक आगरी-कोळी समाजाची देवता असलेल्या कार्ला गडावरील श्री एकविरा देवीचे शिवसेना उपनेते विजय नाहटा यांनी पदाधिकारी-कार्यकर्त्यांसोबत दर्शन घेतले. यावेळी उपनेते विजय नाहटा यांनी प्रकल्पग्रस्तांच्या गरजेपोटी घरांचा निर्णय झाल्याबद्दल आई एकविरा देवीचे आभारही व्यवत केले.
याप्रसंगी विजय नाहटा यांच्यासह महापालिकेच्या माजी विरोधी पक्षनेत्या सौ. सरोज पाटील, माजी नगरसेवक ज्ञानेश्वर सुतार, दिपक सिंग, आतिष घरत, भावेश पाटील, शिरीष पाटील, संजय वास्कर, निहाल वास्कर, तुषार पाटील, आकाश पाटील, महिला पदाधिकारी गीता पाटील, स्मिता सुर्वे, स्नेहा पवार, आदि पदाधिकारी आणि कार्यकर्ते उपस्थित होते.
स्थानिक प्रकल्पग्रस्तांनी गरजेपोटी बांधलेली घरे कायम करण्यात यावेत म्हणून सातत्याने प्रयत्नशील असणारे शिवसेना उपनेते विजय नाहटा यांच्या प्रयत्नांना शासनाच्या निर्णयामुळे यश आले आहे. नवी मुंबई मधील स्थानिकांच्या गरजेपोटी बांधलेल्या घरांच्या प्रश्नात अनेक तांत्रिक अडचणी असल्यामुळे आजवर सदरचा प्रश्न मागे पडत होता. परंतु, तांत्रिक बाजुची जाण असणारे आणि प्रशासनात उच्च पदावर काम केले असल्यामुळे प्रकल्पग्रस्तांचा गरजेपोटी घरांचा प्रश्न सोडवण्याचे आश्वासन विजय नाहटा यांनी स्थानिक प्रकल्पग्रस्त बांधवांना दिले हेाते. विद्यमान मुख्यमंत्री एकनाथ शिंदे यांनीही नगरविकास मंत्री असतानाच सदरचा प्रश्न सोडवला होता. परंतु, अध्यादेश काढण्यासाठी थोडा विलंब लागत होता. अखेर प्रकल्पग्रस्त बांधवांच्या जिव्हाळ्याचा असणारा प्रश्न खासदार नरेश म्हस्के, उपनेते विजय नाहटा, संपर्कप्रमुख किशोर पाटकर यांनी सातत्याने पाठपुरावा करुन मुख्यमंत्री एकनाथ शिंदे, ‘सिडको'चे व्यवस्थापकीय संचालक विजय सिंघल, नगरविकास विभागचे प्रधान सचिव असीम गुप्ता यांच्याशी वारंवार बैठका करुन आता अध्यादेशाचा मार्ग मोकळा करुन घेतला आहे.
त्याअनुषंगाने एकविरा आईचे आभार व्यक्त करण्यासाठी आणि एकविरा आईचे आशीर्वाद घेण्यासाठी उपनेते विजय नाहटा यांनी पदाधिकारी-कार्यकर्त्यांसह कार्लागड गाठले.
